Kā Molokaʻi Makahiki
January 31, 2014
Ma ka lā iwakāluakūmālua o Ianuali i ka makahiki ʻelua kaukani ʻumikūmāhā, ua huakaʻi ka papa ʻōlelo hawaiʻi makahiki ʻehā a Kumu Kalei ʻAʻarona-Lorenzo i ka mokupuni ʻo Molokaʻi. Ma ka mokupuni ʻo Molokaʻi, ua hoʻokūkū nā haumāna me nā haumāna like ʻole o nā mokupuni apau i nā pāʻani Makahiki.
Ua hoʻomaka nā pāʻani Makahiki ma ka pōʻalima ma Nāʻiwa. Ma ka pōʻaono, ua hoʻomau ʻia nā paʻani ma ka pāka ʻo Kaunakakai. Ma mua o nā paʻani Makahiki, ua ʻākoakoa nā kula apau ma Nāʻiwa e hāʻawi i nā hoʻokupu no ka hoʻomanaʻo ʻana iā Lonoikamakahiki.
Ma hope o ka hana hoʻokupu, ua hoʻomaka nā pāʻani me nā ʻanokoa ʻelua o nā kula apau i hele i Molokaʻi. Ua koho ʻia hoʻokahi kāne a hoʻokahi wahine e lilo i ʻanokoa no ko lāua kula. Mai ke kula kiʻekiʻe ʻo Kamehameha ma Maui, ua lilo ʻo Kauanoe Vandepoel lāua ʻo Neʻula Aarona i ʻanokoa. Ua hoʻokūkū nā ʻanokoa apau i ʻumi mau hanana Makahiki ma Nāʻiwa. ʻO ʻUlu maika, Moa Paheʻe, Kōnane, Pā uma, Haka moa, Pōhaku Hoʻoikaika, Uma, ʻŌʻō ihe, Heihei Wāwae, a ʻo Kūkini nā inoa o nā hanana i hoʻokūkū ʻia e nā ʻanokoa. Ma hope o nā hanana likeʻole, ua lanakila ihola ʻo Kauanoe Vandepoel i ʻanokoa Makahiki no ka makahiki ʻelua kaukani ʻumikūmāhā.
Ma hope o nā hanana ʻanokoa, ua hoʻomaka nā hanana kūkahi. Ua lanakila ke kula kiʻekiʻe ʻo Kamehameha ma Maui i ʻewalu mau pāʻani no ke kūlana ʻekahi. Ua lanakila ʻo Carly Kaiani Kiaha i ka hanana Moa Paheʻe, ʻAleʻa Johnson i ka hanana Kōnane, Crystal Hipolito i ka hanana Pā Uma, Siaosi Ngalu i ka hanana Haka Moa, Daisy Aiwoshi i ka hanana ʻŌʻō Ihe, Kaulupono Hokoana i ka hanana Heihei Wāwae, Iain Armitage i ka hanana Kūkini, a me Aaron Morton i ka hanana Lele Pahū.
Ua lanakila pū ke kula kiʻekiʻe ʻo Kamehameha ma Maui i ke kūlana ʻekahi no ka hanana hui Hoʻoili Pōhaku. Aia ʻelima mau haumāna ma ka hui Hoʻoili Pōhaku. ʻO Iain Armitage, Kaulupono Hokoana, Charles Maxwell, Kiana Antonio, a me Kaʻiulani Vila nā inoa o nā haumāna mai ke kula kiʻekiʻe ʻo Kamehameha ma Maui i lanakila i ke kūlana ʻekahi no ka hanana hui Hoʻoili Pōhaku.
Ua leʻaleʻa ka huakaʻi i Molokaʻi no nā haumāna apau o ka papa ʻōlelo Hawaiʻi makahiki ʻehā. Ua lanakila ihola nā haumāna i ʻeiwa kūlana ʻekahi a hoʻokahi ʻanokoa ma nā pāʻani Makahiki i Molokaʻi. He huakaʻi maikaʻi nō hoʻi!